ken666 2008-3-8 13:54
我的故事'學會知足, 懂得愛!' 更新至CH 12 曖昧
[align=center][color=black][b][size=3]序
CH1 情非得已 (PART I)
(PART II)
CH2 垃圾 (PART I)
(PART II) [/size][/b][/color][/align][align=center][color=black][b][size=3] (PART III)
(PART IV)
CH3 甜蜜蜜 (PART I)
(PART II)
CH4 霧之戀 (PART I) [/size][/b][/color][/align][align=center][color=black][b][size=3] (PART II) [/size][/b][/color][/align][align=center][color=black][b][size=3] (PART III)
CH5 逃避你 (PART I) [/size][/b][/color][/align][align=center][color=black][b][size=3] (PART II)
(PART III)
CH6 野孩子 (PART I)
(PART II) [/size][/b][/color][/align][align=center][color=black][b][size=3] (PART III) [/size][/b][/color][/align][align=center][color=black][b][size=3] (PART IV)
CH7 朋友二號 (PART I) [/size][/b][/color][/align][align=center][color=black][b][size=3] (PART II) [/size][/b][/color][/align][align=center][color=black][b][size=3] (PART III) [/size][/b][/color][/align][align=center][color=black][b][size=3] (PART IV)
(PART V)
CH8 男朋友 (PART I) [/size][/b][/color][/align][align=center][color=black][b][size=3] (PART II)
CH9 她一定很愛你 [/size][/b][/color][/align][align=center][color=black][b][size=3] (PART I) [/size][/b][/color][/align][align=center][color=black][b][size=3] (PART II) [/size][/b][/color][/align][align=center][color=black][b][size=3](PART III)[/size][/b][/color][/align][align=center][color=black][b][size=3] (PART IV)
CH 10 不得．不愛 [/size][/b][/color][/align][align=center][color=black][b][size=3] (PART I) [/size][/b][/color][/align][align=center][color=black][b][size=3] (PART II) [/size][/b][/color][/align][align=center][color=black][b][size=3] (PART III) [/size][/b][/color][/align][align=center][color=black][b][size=3] (PART IV) [/size][/b][/color][/align][align=center][color=black][b][size=3] (PART V)
CH 11 好心分手 [/size][/b][/color][/align][align=center][color=black][b][size=3] (PART I) [/size][/b][/color][/align][align=center][color=black][b][size=3] (PART II) [/size][/b][/color][/align][align=center][color=black][b][size=3] (PART III)
(PART IV) [/size][/b][/color][/align][align=center][color=black][b][size=3] (PART V)
(PART VI)
CH 12 曖昧 (PART I) [/size][/b]
[/align][/color]
[[i] 本帖最後由 ken666 於 2008-3-8 14:26 編輯 [/i]]
ken666 2008-3-8 13:54
序
在執筆寫自己的故事時, 我問過自己兩個問題, 一是當我把我們的故事呈現出來的時候, 除了要把記憶中的快樂提取出來之外, 還要把傷心的事也一併取出, 這樣不是越寫越不快樂嗎? 二是既然現在的生活是幸福的, 為何還要去回憶那些不快的過去呢?
到底寫還是不寫呢? 答案是越要去理清自己的思緒就越覺得迷糊, 於是開玩笑地問身邊那個大呆瓜。
「老公, 如果我把我們的過去寫成小說放上網, 你會介意嗎?」雖然是開玩笑, 但仍然很想知道他的答案。
他敲了我的頭一下, 「傻瓜, 我們的過去有甚麼值得別人欣賞呢?」
「但我最近在某個論壇入面見到很多別人的愛情故事, 所以我也很想去寫。」但我並沒有告訴他其實我已經發表過文章, 因為他從來不覺得我寫的小說有可取之處, 亦不懂得去欣賞。
「若果你喜歡就去寫吧! 反正從來你決定要去做的事情我也阻止不了。」他拋下這句話就繼續埋首於砌他新買的模型。
他向來就是這種個性, 愛理不理般, 這麼多年以來已經習慣了! 所以從那晚起, 我開始構思這部屬於我們的愛情小品 – 學會知足, 懂得愛。
ken666 2008-3-8 13:55
CH 1 情非得已 (PART I)
記得果日係我十六歲ge生日, 我同契哥阿倫分別約左一班人出黎bbq, 我負責約女仔, 佢負責約男仔, 所以基本上有好多人我都未見過。
契哥班fd入面有好多都係做車房, 所以借到幾架車, 一啲負責車野過去, 一啲就負責車啲女仔過去, 因為我係主辦人之一, 所以我就跟左第一班車過去先。
去到黑沙燒烤場, 可能果日啱啱考完試, 好多學生都放假, 搵左好耐先系舊大石果頭搵到個爐, 附近仲有兩個爐, 不過就比另一班人霸左, 雖然睇得出佢地好想霸埋呢個爐, 但系見到我地走左埋去就吾好意思咁讓左出黎。
大家玩左好耐, 最初都有啲尷尬同埋吾自然, 但系後來就越玩越熟, 嘻…其實今次算係變相ge相睇活動, 所以當大家都有自己ge目標之後就分開左幾組人各自去玩。
果日咁啱我黎m, 所以無咩mood去玩, 就自告奮勇留低睇野同燒定啲野比佢地食, 契哥見我無咩心機就留系度陪我, 另外仲有一個叫阿基ge男仔同埋我個fd阿cat都留左系度, 於是我地四個人就坐埋一齊傾計。
其實我feel到阿基對我有意思, 因為佢從頭到尾都系我身邊轉, 又鐘意講笑話氹我笑, 又成日搞埋啲小動作玩我, 但我對呢款男仔就無咩興趣, 首先佢吾係靚仔, 而且有啲肥, 另外佢好多野講, 天南地北都吹一餐, 完全系有佢講無我講果種, 又煩又嘈!
契哥睇得出我吾係咁like佢, 所以好識做咁帶左佢去打籃球, 而我同阿cat就繼續坐系度食野傾計。
佢地打左一陣就帶埋兩個fd返黎, 經介紹之後原來佢兩個系放左工先過黎所以遲左, 一個叫阿偉, 一個叫阿諒, 阿諒就係我而家ge男友。
ken666 2008-3-8 13:55
CH 1 情非得已 (PART II)
佢地兩個同之前果幾個男仔吾同, 因為佢地睇落去好惡, 又好靜, 無咩點出聲, 就係自己系度燒野食, 久吾久先講兩句咁, 搞到啲氣氛好差。
我: 哥, 佢地系你啲fd呀? 做咩吾講野ga, 好似吾識咁…
倫: 我同阿偉熟啲, 一同條死仔講話有女溝就仆過黎, 阿諒應該係比佢拉黎卦!
我: 下…咁都得呀!
倫: 係吾係悶親你呀?
我: 都幾ga, 搞到阿cat有啲想走。
倫: 咁我同佢地講下啦!
倫: 喂, 你地吾好咁悶先得ga, 搵啲野講la!
偉: 哦! 你叫咩名呀? (佢望住我, 搞到我好吾好意思)
我: 我叫盈盈。
偉: 盈盈幾好聽呀!
我: 係咩? 你地做咩ga? 睇你地對手咁乾淨吾似做車房wor!
偉: 熟左再話你知。
我: 懶神秘咁。
我無理到佢就攞左隻雞翼走埋去燒烤爐度, 果陣阿諒都坐左系度燒豬扒, 我坐左系佢對面, 兩個人都無講野淨係系度燒野食, 直到佢塊豬扒熟ge時候。
諒: 要吾要食豬扒? (雖然語氣好冷淡, 但佢把聲好溫柔, 搞到我塊面紅曬)
我: 吾好啦, 我燒左雞翼, 你自己食啦!
諒: 我都吾鐘意食豬扒, 不過鐘意燒! (佢將塊豬扒擺落隻紙碟度之後放系我面前, 又去攞第二塊黎燒)
我: 吾該曬! (我拎起塊豬扒, 睇落去燒得幾靚, 又吾怕燶, 點知咬左一啖之後先發現入面吾熟)
諒: 做咩? (佢見到我皺曬眉頭就問我)
我: …塊豬扒未熟…
諒: 無理由ga…
我: 你睇下囉!
我遞左塊豬扒比佢睇, 佢見到吾熟之後就攞起黎再燒過, 我地又無再講野, 佢有佢燒我有我燒, 但我就偷偷地望左佢幾次, 佢果陣啲頭發長到膞頭又染左啡紅色, 睇落去成個不良少年咁樣, 可惜當時我年紀輕, 覺得呢啲先叫做型, 所以咁就比佢迷住左。
大約燒到十點幾佢地就話想去唱k, 於是又浩浩蕩蕩咁出發, 阿基堅持要我坐佢架車, 雖然好無奈, 但又吾想搞到契哥難做, 唯有拉埋阿cat一齊。
去到top one之後搵左間大房, 等齊人之後先發覺阿諒並無黎到, 聽佢地講話佢眼瞓吾黎, 果陣真係有啲down, 不過好快就無事咁同佢地玩。
我以為果次會系我地第一次亦都系最後一次見面, 因為我地無交換過電話, 而且聽契哥講佢好少會同佢地班人一齊出黎玩, 佢都系見過阿諒一兩次, 所以我諗就算我對佢有feel都無用啦, 吾通要我去溝佢咁瘀皮咩!
ken666 2008-3-8 13:56
CH 2 垃圾 (PART I)
自從上次唱k之後我就同阿偉熟左, 佢話好鐘意我啲性格, 所以認左我做阿妹, 之後差吾多日日都有打電話比我, 成日問我想吾想同佢單獨出去食野, 我次次都推佢, 因為我知道佢對我有feel, 但我就對阿諒念念不忘, 連我自己都講吾出點解, 就淨係覺得掛住佢。
有一日契哥阿倫打電話比我, 同我講阿偉話我成日請佢食檸檬, 搞到佢好無引, 於是我就同契哥講話我對阿諒有feel多啲, 果陣契哥笑我犯賤, 有個鐘意自己ge吾要, 系都要揀一啲無結果ge中埋去, 但就笑笑口咁話幫我同阿諒講, 我開頭以為佢講笑就答佢話好。
點知佢講真, 過左幾日之後我就收到阿諒ge電話。
諒: 我係阿諒, 你係咪盈盈? (雖然好多日無見, 但我仲好記得佢把溫柔ge聲音)
我: 嗯。(我簡直嚇到呆左, 都吾知比咩反應佢好)
諒: 出吾出黎食野?
我: 下…吾去啦, 我要睇電視。(我記得果晚系美麗人生大結局)
諒: 佢話吾去呀, 要睇電視。(我聽到佢同其他人講野, 我估係阿偉)
諒: 咁等你睇完先去。
我: 咁…有邊個先? (我個心好想去, 但又驚得我同阿偉兩個吾知點好)
諒: 阿偉同幾個fd都會去, 你可以叫埋你d fd都得呀!
我: 咁好啦, 我再打比你呀, 你幾多號電話?
諒: 66……
收線之後我即刻打電話比阿cat約佢出去, 好彩佢咁啱發呆中, 所以一口就應承左我, 另外仲有佢家姐yoyo都話去。
我覆返阿諒, 佢話黎接我地, 不過得一部電單車車吾到咁多個, 因為我屋企住系黑沙環, 所以佢就黎接我, 而阿cat屋企就系康樂館附近, 離沙梨頭細龜好近, 所以佢地就自己行路去。
ken666 2008-3-8 13:56
CH 2 垃圾 (PART II)
仲記得美麗人生果結局好慘, 常盤貴子死左, 木村幫佢梳頭果幕搞到我勁喊, 喊到對眼都腫左, 用極粉底都遮吾到, 唯有帶住對蕃茄眼去見佢。
一落到樓下就見到佢坐左系電單車度食煙, 我行埋去叫左佢一聲, 佢呆左一下, 好似吾認得我咁, 搞到我勁尷尬吾知講咩好。
諒: 做咩對眼咁紅?
我: 頭先美麗人生個結局好慘。(講起都仲想喊)
諒: 明知係假都喊一餐, 走啦! 佢地等緊。(佢好不屑咁望左我一眼就將個頭盔掟比我)
我: 咁睇戲吾入戲睇黎做咩wor! (我頂返佢, 個心入面為左佢頭先果句野吾開心, 覺得佢一啲都吾明白咁叫浪漫)
我坐系佢後面, 佢開得好快, 我好驚但又吾敢攬住佢條腰, 個身就有一下無一下咁撞埋佢背脊度, 搞到佢最後終於忍吾住, 系一盏紅綠燈前面捉住我隻手攬住佢條腰。
食完宵夜之後我地去左南灣湖吹水, 原來佢地好鐘意去果度, 差吾多晚晚放工之後都會去, 我坐左阿諒部電單車, 而阿cat就坐阿偉部, yoyo就坐新識ge華仔部, 連埋其他自備女友ge人一共五部車一齊出發向住同一個目的地進發, 突然覺得自己變成左不良少女咁。
去到南灣湖之後佢地搵左一個地方坐, 我同阿cat就坐埋一邊, 因為yoyo同華仔傾得好埋, 所以兩個人就匿埋一邊談心。
我同阿cat都不其然咁望住阿諒, 見佢煙不離手咁, 都不約而同笑左出黎。
我 : 佢成個煙剷咁!
Cat: 系呀! 仲超爛口, 頭先聽到佢6個字可以講到成廿個字咁多。
我 : 咦, 你好似對佢幾有興趣wor? (見到佢個樣我都估到七八成)
Cat: 你都一樣啫! (佢之前拍過好多次拖, 所以一眼就睇得出我對阿諒有感覺)
我 : 嗯。
Cat: 溝仔第二, 友誼第一, ok?
我 : 我以為你會讓我tim!
Cat: 呢啲野邊有得讓ga…
我無出聲, 因為我吾同阿cat, 我吾識好似佢咁積極去爭取自己鐘意ge野, 所以吾駛諗都知佢一定會贏啦。
ken666 2008-3-8 13:57
CH 2 垃圾 (PART III)
阿偉見我地兩個坐埋一邊就走埋黎撩我地玩, 於是我地就玩「真心話」遊戲, 第一個問問題ge人係阿偉, 答問題ge人係華仔。
偉 : 華仔, 你係吾係睇中yoyo?
華 : 嘩, 第一條就咁激? 吾答你, 我飲, 下一個…哈, 阿偉, 到番你wor…你係吾係想溝盈盈?
偉 : 哈, 你吾答我我都吾答你, 我飲, 下一個…阿cat, 你係吾係處?
Cat: e…問啲咁ge野ga, 吾係呀! 下一個…阿諒, 你有無女?
諒 : 無, 下一個…盈盈, 你讀書叻吾叻? (佢問完之後個個都望住佢, 好似覺得佢好白痴咁)
偉 : 阿諒, 你吾識問等我問啦!
諒 : 本來我都話吾x玩, 係你地逼x我玩之嘛! Xxxx, 吾x玩啦, 我去釣蝦。(佢好無引咁一個人走左去湖邊)
偉 : 吾駛理佢ga, 啱啱甩拖係咁狗樣啦, 我地自己玩啦!
玩左一陣之後我阿媽打電話比我, 果陣時我老豆做保安長年返夜, 阿媽就同其他人夾份開麻雀館, 晚晚打麻雀打天光, 飲埋茶先返屋企, 所以夜晚我好free, 鐘意點都得, 不過阿媽就會時時打電話check我。
我行左去阿諒果邊聽電話, 因為果度無咁嘈。
媽: 我打電話返屋企無人聽ge, 你去左邊呀?
我: 我…我去左秋萍屋企, 我地要做暑期功課! (秋萍係我好朋友, 佢成績好好, 所以我阿媽好鐘意佢)
媽: 成兩點仲做咩功課呀, 玩就玩啦, 怕吾怕阻住佢屋企人呀?
我: 吾怕, 我一陣就走啦! (你夠成兩點都仲打返黎囉, 瞓左都比你吵醒啦)
媽: 嗯, 吾好咁晩呀, 返屋企危險。
收左線之後, 我坐左系阿諒附近, 不過中間隔左幾個人ge空位, 睇住佢用條魚絲系度拉下拉下咁, 好似好好玩。
我: 你系度做咩呀?
諒: 釣泥鯭囉!
我: 咁都釣到咩? 我又想玩呀!
諒: 釣到, 你坐咁遠我點教你呀!
我: 哦。
我坐左埋去佢隔離, 佢捉住我隻手教我點拉條魚絲, 果陣真係覺得好開心。
諒: 你讀書一定好叻。
我: 你又知?
諒: 估囉, 不過好似你呢啲乖學生吾應該群埋我地班垃圾度。
我: 垃圾? 我吾覺wor, 同你地一齊玩好開心呀!
諒: 你根本吾知我地做咩, 跟住我地會學壞呀!
我: …(佢咁講我都吾知點答佢)
諒: 聽我講, 你仲細, 有大把前途, 吾應該咁樣放棄自己。
我: 嘩, 你都吾係大我好多啫, 咁你又放棄自己?
諒: 我大你三年呀, 睇多你好多野, 而且我呢啲無得救啦!
突然之間覺得佢同之前好吾同, 佢講ge野好成熟, 而且系我面前無講過粗口, 搞到我對佢ge好感又多左幾分。
後尾阿cat同阿偉見到我地玩得咁開心又走左埋黎一齊玩, 四個人就咁玩釣泥鯭玩到天光。
ken666 2008-3-8 13:57
CH 2 垃圾 (PART VI)
玩到差吾多六點, 個個都好攰, 攤曬系啲櫈度瞓覺, 我就坐系地下挨住牆休息, 因為從來都未試過去夜街搞到成晚無返屋企, 更加未試過系咁ge環境之下瞓覺, 所以瞌埋眼又醒咁。
諒: 瞓吾著呢? (佢坐左系我隔離, 又拎支煙出黎吸)
我: 唔, 有啲吾慣。
諒: 所以我話你同我地班人吾同, 我車你返去做乖乖女啦！
我: 吾駛, 我鐘意咁樣。
諒: 哈…你都幾得意wor, 有無睇過日出?
我: 未呀。
諒: 我車你去睇呀!
我: 好呀! 但係佢地…
諒: 吾駛理佢地, 瞓醒佢地會走。
我都吾知果陣點解會咁大膽, 真係無諗過其他野就跟左佢走, 可能覺得佢吾似壞人卦, 又或者係我鐘意佢。
我地去左海皮果邊睇日出, 我從來都無睇過日出, 所以覺得果日特別靚。
我: 你覺吾覺得好靚呀?
諒: 成日都睇, 無咩特別! (佢又拎左支煙出黎吸)
我: 朝早空氣咁好, 你可吾可以吾好食煙呀!
諒: 我無食呀, 我吸之嘛! (佢望左我一眼就將支煙整熄左)
我: 估吾到你都識講笑呀!
諒: 咁都算講笑? 你都幾易氹wor! (佢眼定定咁望住我, 搞到我面都紅曬咁低頭)
我: 咩你地成日都咁話我ga, 咁真係好笑吖嘛!
諒: 你咁樣好蝕底ga, 咁易就比啲仔氹, 姦左你都吾知咩事呀!
我: wa…咁講野ga你!
諒: 我講真ga, 好似你跟我出黎咁吖, 如果我係壞人ge話你仲有得剩咩!
我: …我…我吾係咁隨便wor! (我好想同佢講吾係你ge話我睬佢都傻呀)
諒: 個天都光曬啦, 車你返去, 我晏啲要返工, 放工再搵你!
我: 嗯。(我記得我果陣好開心, 不過後來阿諒同我講返話我果陣一直系度傻笑, 個額頭鑿左個「姣」字wor)
佢同我去m記食左個早餐之後就送左我返屋企, 好彩果陣我好醒目, 特登將露台盏燈開左, 如果我返去ge時候熄左即係代表阿媽或者老豆已經返屋企, 未熄就代表屋企無人, 而果日咁啱就無人系屋企, 咁就過左骨, 無人知我成晚無返。
果日我好開心, 諗到佢話放工再搵我就興奮到睡吾著覺, 點知到我真係瞓醒ge時候已經夜晚七點幾, 但佢都無搵過我, 搞到我個心又好吾開心, 覺得佢有心玩我。
ken666 2008-3-8 13:58
CH 3 甜蜜蜜 (PART I)
自從上次見面之後阿諒就成三日無搵過我, 我知道自己好蠢, 以為佢會有一啲啲鐘意我, 其實根本就係我自己系度發夢。
果三日入面我完全玩自閉, 因為心情勁差, 吾想影響到其他人, 所以個個打比我都無聽, 直到第四日阿cat打比我, 我見都頹左咁多日就聽左佢電話, 原來佢姨媽介紹佢去工廠做暑期工, 問我有無興趣一齊, 我見反正仲有成個幾月暑假無野做就應承左佢。
果次係我第一次做暑期工, 所以咩都吾識, 我地做ge係剪線頭, 多勞多得, 間廠有好多阿姨, 第一日返工就比佢地問候到阿媽都吾認得, 又話我地無家教搶佢地啲野做, 真係吾知點同佢地溝通。
一日入面最開心都係下午茶時間, 我同阿cat買左兩碗綠豆沙坐系樓梯度食。
我 : 我吾想做啦, 啲阿姨把口超賤。
Cat: 吾好啦, 當陪下我吖嘛, 反正佢地有佢地講, 我地有我地做啫。
我 : 但真係好難頂呀!
Cat: 無計啦, 我呢排等錢洗呀! 系wor, 你果晚係吾係同阿諒走左呀? 醒返就吾見左你兩個, 之後打比你又成日都無人聽。
我 : 佢車我走先之嘛, 之後我返左大陸呀! (我無同佢講我地睇日出啲野, 更加無講我為佢傷心左幾日)
Cat: 不如我地睇下佢冧邊個多啲呀!
我 : 下…吾好啦卦, 咁瘀。(我知道我實輸梗啦)
Cat: 怕咩啫, 又吾係叫你親口問佢。
我 : 咁吾係點知呀?
Cat: 我自有辦法啦, 不過有條件。
我 : 咩條件呀?
Cat: 就係輸左果個要送贏果個xx手袋。
我 : 下…好貴wor, 成兩千蚊呀! (我已經打定輸數)
Cat: 咁先好玩呀, 點呀?
我 : 咁點試先?
Cat: 我地今晚咪要加班ge, 一人send一條訊息比阿諒叫佢黎接放工, 睇下佢接邊個咪知囉。
我 : 下…咁都得呀? 但如果佢兩個都吾接呢?
Cat: 咁咪就係兩個都無機會囉, 蠢!
我 : 咁…好啦!
於是我地就分別send左一條訊息比佢, 我吾知阿cat send啲咩, 不過我就寫「我今晚要加班, 可能要十點先走得, 可吾可以黎接我呀?」, 因為我諗住如果佢吾應承我最多咪話send錯左比佢, 起碼無咁瘀皮先啦。
ken666 2008-3-8 13:58
CH3 甜蜜蜜 (PART II)
我同阿cat一邊做一邊等電話, 等左好耐, 差吾多九點半佢個電話就響, 因為無來電顯示, 所以吾知道係吾係阿諒。
Cat: hello…唔, 我係阿cat…果晚盈盈個fd…阿偉比我囉…下…哦…咁吾好意思wor…唔, 拜拜!
我 : 阿諒呀? (見佢收左線我就問佢)
Cat: 曬氣…佢都吾記得我係邊個, 問我做咩send啲咁ge野比佢wor!
我 : 下…咁你send咩呀?
Cat: 咪話「今晚好夜先收工, 如果有人黎接我就好啦」, 就咁之嘛!
我 : 死啦, 佢會吾會一陣打黎話埋我ga? (我面皮薄係人都知)
Cat: 點知佢呀, 扮曬cool咁。
我 : 或者我都係熄左機好啲!
我拎部電話出黎諗住熄機, 點知見到有一條訊息, 原來係阿諒send比我, 寫住「之前好忙無搵你, 吾好意思, 你係邊度做野, 我接你! 諒」, 我開心到差啲攬住阿cat錫, 不過最後我都控制住, 無係佢面前失控, 扮到無野咁回左條訊息比佢,寫住「我係激成第二期返工, 十點走得, 不如你系龍園等我」, 佢覆我ok之後我就繼續做野。
Cat: 同邊個send訊息咁開心呀?
我 : 無呀, fd囉! (我吾想同佢講我同阿諒ge事, 因為未確定ge野我吾想話比人知)
Cat: 你有邊個fd我吾識ga?
我 : 遲啲先介紹比你識啦!
Cat: 咁好啦, 睇黎我地兩個都吾中標wor, 我都係要繼續努力賺錢買xx手袋啦! (原來佢根本無諗過我會贏, 激死我啦)
我 : 下…原來一開始就想坤我買個手袋送比你! (我扮嬲咁搶左佢紥衫黎剪, 但個心就已經飛左去阿諒度)
踏正十點鐘我地就放工, 我送左阿cat去搭巴士之後先衝去龍園度會合阿諒, 佢果日著左件粉藍色恤衫同黑色西褲, 睇落去好有型。
我: wa, 今日著得咁四正ge?
諒: 啱啱放工嘛, 肚吾肚餓呀? 去食野!
我: 好呀, 食咩呀?
諒: 我約左阿偉佢地去我屋企睇波, 你一齊黎啦。
我: 下…我吾識睇波wor, 而且我聽日要返工呀, 吾去啦!
諒: 咁我陪你去食野先啦!
我: 吾好啦, 我阻吾阻住你呀?
諒: 吾怕, 想食啲咩呀?
我: 你話事啦!
諒: 去食炒蜆。
跟住佢帶左我去錦繡果邊食炒蜆同埋粥, 原來果日咁啱係七夕, 不過我無留意到,之後諗返先知, 食完大約十二點度就送左我返屋企。
我整好曬啲野之後大約一點就諗住瞓, 點知佢就打電話比我。
諒: 仲未瞓呀?
我: 諗住瞓啦, 你吾係睇波咩? (我聽到佢果邊好嘈, 應該仲睇緊)
諒: 中場休息嘛! 你聽日放幾點呀?
我: 吾知ga, 如果趕貨可能又要加班。
諒: 咁ge工都有, 辛吾辛苦呀?
我: 幾啦, 啲阿姨好衰ga…
諒: 咁咪吾好做囉!
我: 下…我都有諗過, 不過想陪阿cat之嘛。
諒: 阿cat? 哦…我記得啦, 著吊帶果個, 聽日你send訊息話我知放幾點, 我接你。(車, 果晚隨左我之外個個都著吊帶, 亂講都中啦)
我: 你得閒咩?
諒: 呢排都好得閒, 如果你有時間可以搵我呀!
我: 哦。
諒: 你都幾聽話wor, 我講咩你都話好。
我: 下…吾係要點答呀?
諒: 無呀, 咁答幾好…
跟住我地傾左成廿幾分鐘電話, 直到阿偉叫佢睇下半場先收線, 我吾知佢咁做算吾算係有啲鐘意我, 但我就覺得自己越來越鐘意佢。
ken666 2008-3-8 13:58
CH 4 霧之戀 (PART I)
真係超頂吾順班阿姨, 越來越過份, 日日霸住曬啲衫吾比我地, 佢地又做吾曬, 搞到晚晚到左八九點要啲姑娘開口先放返啲衫出黎, 我地就要趕頭趕命咁剪, 晚晚都成十點先放工, 好彩阿諒佢每次都黎接我放工, 不過我就無同阿cat講過。
我 : 今晚華仔生日呀, 你去吾去呀?
Cat: 家姐佢一早就同佢出左去啦, 邊有人七月十四生日架, 邪到爆! 我都係吾去啦, 而且費事見到個賤精。
我 : 下…哦, 你話阿諒呀?
Cat: 總之我吾去啦, 你玩得開心啲啦!
我 : 咁好啦, 我聽日吾返工啦!
Cat: 吾好意思呀, 累左你!
我 : 傻啦, 我都有錢架嘛!
果日我無加班, 五點半就同姑娘講我走先, 其實果度啲姑娘都好好人, 成日幫我地罵爆班阿姨, 所以我先至會做咁耐。
我返屋企換衫化妝, 整好曬啲野差吾多七點, 阿諒佢就打比我, 之前我地約左話佢車我過去。
落到去樓下, 佢一見到我就笑左一下。
諒: 之前無見你化妝ge?
我: 我返工無化之嘛, 之前同你地出街都有化, 你無留意啫!
諒: 我都係鐘意你無化妝個樣多啲! (嘩…我可吾可以當係你鐘意我呀)
我: 係咩…我地而家過黑沙呀?
諒: 係呀, 過橋可能會大風, 你著住我件風褸先啦! (佢除左件風褸比我, 件衫仲有佢啲古龍水同埋煙味, 吾知點解覺得好好聞)
果日華仔叫左好多人, 都未行到埋個爐度就聽到啲魚蝦蟹滿天飛, 我地兩個係最遲去到, 所以一入到去個個都望住我地, 又笑我係佢條女, 搞到我好尷尬。
X : 阿諒, 咁x耐先黎ga, 同條女去邊x度黎呀?
諒: 咪x戇x啦, 佢係華仔條女個fd, 又係阿偉個契妹, 我先車佢咋。(佢呢句話就好似提醒我吾好自作多情咁)
X : 嘩, 阿偉就吾x啱啦, 有個咁x正ge契妹都吾x介紹我識。靚女, 我叫雄仔呀!
我: 我叫盈盈。(講完之後我就走左埋去yoyo果邊, 因為華仔掛住同班fd玩無理佢, 所以佢都係一個人)
Yo: 盈盈, 呢度我淨係識你咋, 你坐系度陪我呀!
我: 我都係淨係識你呀, 阿偉佢又吾得閒。
Yo: 你知吾知佢地其實做咩ga?
我: 好似做賭場呀, 不過睇佢地好複雜!
Yo: 下…你真係吾知呀? 佢地陪人賭ga。
我: 下…吾知wor, 我無問呀…
Yo: 我都係跟左華仔之後先知, 而家好後悔, 佢地都有底…
我: 咁你吾係真心鐘意佢咩?
Yo: 少少咋, 不過係見佢幾靚仔咁咪諗住同佢玩下囉, 而家想飛佢都難啦!
我: 吾會卦。
Yo: 所以我勸你仲未中個頭埋去之前吾好同佢地班人玩咁多, 睇下佢地幾喪就知啦!
我: 哦!
ken666 2008-3-8 13:59
CH 4 霧之戀 (PART II)
我同yoyo好似兩個局外人咁坐埋一邊, 華仔叫左條靚仔負責燒野比我地食, 所以我地全程都坐埋一邊, 好無聊咁, 而阿諒就好似吾識我咁無理我, 仲同第二啲女玩隊啤, 隊到啲女溫溫地就借啲意挨落佢度, 睇到我眼火爆。
我好大膽咁行左過去阿偉度, 果陣時起碼有成十個人, 7個男仔3個女仔。
偉: 盈盈, 你過黎就啱啦, 啲女都比阿諒隊冧曬, 你試下同佢猜。
我: 好呀! (我鬥氣咁坐左過去佢隔離, 果陣有另一條女坐佢旁邊, 個頭仲挨左落佢膞頭度)
諒: 我吾同你玩。
X : 哦…好x少見你wor, 你邊x度呀? (伏係佢膞頭個女仔問我)
諒: 唏, 你咪x黏埋黎啦, 成身酒味。
X : 喂, 你今日食x左火藥, 咁x惡ge!
諒: 阿光, 帶neko去廁所沖水, 咪x比佢系度發癲! (佢同一個男仔講, 之後個男仔就帶左neko走)
我: 點解吾同我玩呀?
諒: 你又吾識飲。
X : 一係佢輸我飲。(另一條仔坐左系我隔離, 佢倒左杯酒擺系度撐我)
我: 而家可以同我玩啦!
諒: 痴線! 而家我吾想玩。
X : 妖…佢痴x線ga, 靚女吾好理x佢, 我叫阿峰, 你叫咩名?
我: 我叫盈盈。
峰: 盈盈好好聽wor, 你幾多號電話呀? 得閒我約你去街呀!(聽佢咁講之後我望左阿諒一眼, 見佢又扮到吾識我咁, 我就鬥氣咁比左個電話佢)
我: 65xxxxxxx
峰: 好, 我一有時間就打比你。
我: 好呀, 阿偉, 我想走啦。(反正留底咁無聊, 我就同阿偉講我想走)
偉: 咁快?
我: 我聽日要返工。
偉: 咁好啦, 我送你返去呀!
我: 吾駛啦, 應該可以趕到尾班車, 我而家就走啦。
偉: 我送你出去搭車, 而家咁夜會危險呀!
峰: 吾x駛麻煩啦, 我車你返去!
雄: 靚女吾好聽佢地講啫, 我雄仔份人最正經啦, 坐我車包你安全返到屋企。
偉: 嘩…你班色狼呀, 睇x住曬我契妹做咩x野呀, 佢吾x會騷你地啦, 早抖啦! 佢搭邊x個架車黎就搭邊x個架車返。(阿偉佢知道我鐘意阿諒, 所以都好識做)
我: 吾好麻煩啦, 我真係自己搭車就得啦! 走啦, 拜拜。
諒: 走啦, 我送你。(佢拎起條車匙就走)
ken666 2008-3-8 13:59
CH 4 霧之戀 (PART III)
我扮聽吾到佢講野, 淨係好快好快咁行, 行到條直路果陣兩邊無燈, 成條路黑漆漆咁, 搞到我超驚, 就索性用跑咁沖出去, 我聽到佢不斷系後面叫我, 但我都無停低, 直到去到門口, 見到最後一班車都走埋, 我就覺得好可憐, 好想喊。
諒: 凍呀, 著住條風褸先啦! (佢又除返件風褸披系我度, 當見到我喊ge時候就攬住我)
我: 你行開啦! 我地又無關係, 你攬住我做咩wor! (佢聽左之後真係放開左我)
諒: 走啦, 我送你返去。
我坐系佢後面果陣仲不停咁喊, 又無攬住佢條腰, 所以佢開得好慢, 好似得三四十米車, 點知去到十二生肖馬路果度突然之間落大雨, 搞到我地成身都濕曬, 於是佢打左個電話比華仔, 叫佢開車黎接我。
吾駛一陣華仔架車就黎左, yoyo都係入面, 睇黎場雨令到佢地個party要提早散band。
諒: 你快啲過去佢地部車度啦, 吾係淋病你呀! (佢將車門打開推我入去)
我: 咁你呢?
諒: 我要揸架車返去呀!
我: 咁你小心啲呀!
之後我就坐左華仔架車返屋企, 返到去之後我沖左個熱水涼, 瞓系張床果度又喊左上黎, 因為覺得自己好蠢好笨, 點解會以為佢鐘意自己, 點解要中個頭埋去…
喊喊下我就瞓著左, 直到三點幾我被個訊息嘈醒左。
諒: 今日做咩喊?
我: 吾關你事。
諒: 講我知!
我: 吾想講, 我不過係華仔條女個fd, 阿偉個契妹, 同你都無關係, 我喊關你咩事呀?
諒: 對吾住, 我有野同你講, 打比你!
我: 吾好, 我吾想聽到你把聲。
佢無理度, 依然打左電話過黎, 我cut左佢三次線但佢繼續打黎, 我唯有聽佢電話。
我: 你想講咩呀? 快啲講啦, 我要瞓。
諒: 你把聲咁ge? 仲喊緊呀?
我: 吾講我收線。
諒: 咁惡ga, 一啲都吾似你呀, 我講啦, 你係吾係鐘意我呀?
我: 下…
諒: 阿偉佢地之前同我講過, 不過我吾信, 但而家我諗應該係真ga!
我: 佢地同你講左?
諒: 嗯, 約你去海皮果晩講。
我: 哦。
諒: 傻豬, 你喊咩啫? 因為我吾理你呀?
我: 好噁呀, 咩傻豬啫。
諒: 吾係傻咩? 無啦啦喊一餐。
我: 吾係你我就吾會喊啦。
諒: 嘩, 吾好咁惡啦, 我吾理你都係吾想你比人誤會係我條女啫!
我: 得啦, 我知啦, 我地無機會吖嘛!
諒: 吾係無機會, 係無可能啫, 我吾想害左你呀!
我: 害我咩呀? 完全吾明wor!
諒: 我地係垃圾, 連屋企人見到都憎, 點配同你呢啲乖乖女係埋一齊呀!
我: 下…我從來都無咁諗過wor!
諒: 你而家吾會厭棄啫, 但到你大過啲你就會覺得我地好垃圾啦, 所以而家咁吾係幾好咩?
我: …我吾知wor, 不過如果我話我吾介意, 我想試下呢?
諒: 咪傻啦, 我覺得維持返而家ge關係最好!
我: 我眼瞓啦! 下次再傾。
我無比機會佢再講落去, 講完之後就即刻cut左佢線, 我真係好驚佢會再講一啲更傷人ge野, 咩叫維持而家ge關係啫, 鐘意咪一齊, 吾鐘意咪叫我吾好纏住佢囉, 點解要搞到咁曖昧wor!
ken666 2008-3-8 14:00
CH 5 逃避你 (PART I)
自從大家講清楚之後, 我就無再打電話比佢, 亦都無再返工, 而佢最初都有打比我, 但我無聽幾次之後就無再打黎, 我諗佢都係吾想當面拒絕我所以先至話保持現狀。
個心一直都好痛, 估吾到第一次鐘意人就搞成咁, 真係出師不利, 好頹好頹咁匿埋系屋企, 個個搵我都吾睬吾理, 直到阿cat同阿倫忍吾住剷左上我屋企。
倫 : 阿妹呀, 做咩搞成咁呀?
Cat: 盈盈, 打左咁多日電話你都無聽, 見到你又成個傻婆咁, 到底發生咗咩事呀?
我 : 係fd就吾好問啦! (我又開始喊, 果幾日不停咁喊, 喊到人都乾乾地)
Cat: 入去換衫, 我地出去行下啦, 再咁落去屈死你呀!
我 : 我吾想去呀!
倫 : 吾好逼我用暴力呀! (佢捲起啲衫袖想抱我咁, 我即刻彈開)
我 : 換咪換囉!
我衝左入房, 好吾願意咁換左套衫之後就跟左佢地出去, 原本以為淨係去飲野, 點知佢地帶左我去唱k, 去到果陣本來得我地三個, 後黎越來越多人, 仲連上次燒烤果個阿基都有黎, yoyo又帶左華仔黎, 搞到好熱鬧咁, 但我就無咁心機坐埋左一邊。
基: 盈盈, 做咩咁悶呀, 我講笑話比你聽呀?
我: 吾駛啦, 我吾想聽!
華: 你本身咪就係個笑話囉, 仲有咩好講啫! (佢吾知幾時行左過黎, 好似擺明撩交嗌咁串阿基)
基: 你講咩x野呀?
華: 講x你囉, 又吾x照下塊鏡, 想溝我地盈盈, 收皮啦!
我: 妖, 你地好煩呀, 要打就打飽佢, 我出去透透氣, 痴線ga!
我已經煩到嘔, 但佢地仲系度嘈怨巴閉, 我無再理到佢地就走左出去, 攞左罐喜力出去門口度隊, 其實我從來都無咁喪過, 係自從同阿諒搞疆左之後先至放任自己, 而家諗返都覺得戇居。
坐左一陣就見到阿偉同阿諒黎到, 阿諒仲車住neko, 果陣突然有一種好憎自己ge感覺, 我為左佢醉到爛泥咁又點呀, 佢咪又係同第二條女一齊, 點解我要咁犯賤, 為左一個吾鐘意自己ge男仔作賤自己啫!
果一刻有一啲清醒, 又或者係因為飲左啲酒壯大左個膽, 我走埋去佢地度, 一手撟住阿偉隻手, 成個人挨曬落佢個身度。
我: 哥, 我有啲醉呀, 扶我返入去啦!
偉: 吾識飲又飲咁多! (佢伸手想扶住我條腰)
諒: X, 搵你又吾x理我, 而家又飲到咁x醉, 想點呀? 走, 我車你返屋企! (佢好大力咁捉住我隻手, 塊面燶到爆, 又好惡好大聲咁罵我)
我: 關你咩事呀! (我甩開佢隻手, 自己行返入去)
諒: 你仲入去電邊x個呀? 貓到咁, 想比邊x個姦呀?
佢又拉住我, 我又甩開佢, 我地就系門口度拉拉扯扯咁, 啲人行過都望住曬, 阿偉同neko又勸吾掂佢放手, 就返入去搵救兵。
ken666 2008-3-8 14:00
CH 5 逃避你 PART II
阿基第一個衝左出黎, 見到我地鬧到面紅耳綠, 佢又拉住我另外一隻手想拖我返入去, 於是我就好似個公仔咁比兩個男人拖黎拖去, 華仔同阿倫出到黎就一人幫一邊, 華仔一拳打左埋去阿基度, 阿倫同阿諒對罵, 我夾係佢地中間都吾知點好, 想走又吾走得, 最後嘈到間bar 啲人走出黎勸交, 阿諒先好嬲咁放開我。
原本我諗住走, 但個頭又鬼死咁痛, 最後都係入返去坐, 阿倫同阿基就走左, 所以個場可以話淨係得番阿諒班fd, 搞到我同阿cat都勁無引, 果條neko又當正自己開演唱會咁, 成日霸住支咪, 仲要係獨唱, 吾比其他人一齊唱, 原本我個頭已經超痛, 再加埋佢啲音波功簡直就好似要爆開咁。
再坐左一陣我同阿cat都頂吾順, 我同佢講我去埋個廁所就一齊走, 去完廁所之後出黎就見到阿諒企系門口, 佢怒啤住我, 我無理度就繞過佢, 佢又一手捉住我。
諒: 你算點呀?
我: 吾知你講咩wor!
諒: 咪話同以前一樣囉, 你做咩避開我呀?
我: 我同普通朋友ge相處方式不嬲都係咁ga啦!
諒: 你當我係普通朋友?
我: 係你要我當係ga!
諒: 我吾係咁ge意思!
我: 我聽到ge就係咁ge意思!
諒: 收聲, 我講一咩話??頂幾句, 完全都吾聽我講! 我根本吾係咁諗。
我個頭越黎越痛, 又好想嘔, 對住佢我已經無咩想講, 亦都吾知可以講咩, 淨係知道啲眼淚係咁流落黎, 但我又吾想係佢面前喊, 就推左佢一下, 自己衝返去房度。
行到去門口就見到neko企左系度, 最初我以為佢等阿諒就無理度推門諗住入返去, 點知佢一手擋住我隻手。
Neko: 靚妹, 跟我過去果邊, 我同你傾啲野! (佢指住對面間房, 果陣無人用)
我: 我又吾識你, 有咩野傾呀?
Neko: 你係吾係冧阿諒?
我: 關你事咩?
Neko: 無, 不過係見你年紀咁細, 想提醒下你啫!(聽到佢咁講, 我好自然就跟左佢過去第二間房度)
我: 提醒我咩呀? (因為個頭好痛, 所以我語氣吾係幾好)
Neko: 你吾好咁惡先啦, 大家一齊玩得就係朋友啦, 見到你就好似見到我自己咁, 唉!
我: 吾係卦! (我好想講話似你就死得啦, 我仲有大好ge前途, 一定吾會淪落到過呢啲夜夜笙歌ge日子。)
Neko: 你都吾知道我以前都好似你咁純ga, 自從群左佢地班人之後先至晚晚去浦, high野當進補咋, 所以我勸你都係返屋企早抖啦!
我: 吾駛你講我都會!
Neko: 仲有呀, 吾好再纏住阿諒啦! 佢而家係我條仔, 我吾想我地之間有第三者。
我: 我幾時纏住過佢呀? 麻鷹吾管管雞仔。
Neko: 係就得啦, 不過好似你呢啲發育都未完成而且仲有baby fat ge妹妹仔, 我諗阿諒都吾會咁無眼光ge!
我: 痴孖筋, 費事同你講!
ken666 2008-3-8 14:01
CH 5 逃避你 PART III
我入返去同阿cat拎埋手袋就走, 阿偉就送我地出去諗住幫我地截埋的士, 點知係門口就見到阿諒同neko系度嘈緊。
諒: xxxx, 你邊x隻耳仔聽到我講話你係我條女呀? (佢背對住我地, 所以吾知我地出左黎)
Neko: 吾係咩? 咁你又同我搞? (佢喊得好勁)
諒: 你仲x夠膽提? 導x我仲將啲相比阿欣睇, 我都未x同你算賬, 你仲講咩x野呀? (阿欣係佢之前條女, 拍左年半拖就因為neko散左)
Neko: 我導x你? 你吾x願意ge我逼x到你除褲呀? (佢望左我一眼, 特登大大聲講比我聽)
諒: xxxx, 我今日吾x打x你就吾x出黎行。(佢好大力咁打左neko一巴, 阿偉見到就走上去攔住佢, 驚佢真係會癲到殺左neko)
我同阿cat就扶左neko埋旁邊坐, 佢係咁喊, 喊到我地心都煩埋, 我好大聲咁罵左佢一句。
我: 喊夠未呀?好煩呀!
Neko: 你咪咁x得戚, 今日ge我就係聽日ge你, 你以為佢真心鐘意你呀? 佢不過玩你咋! 就好似玩我咁…(阿諒吾知幾時沖左過黎, 揪住佢啲頭髮, 將佢塊面壓左埋牆度)
諒: 你試下再搞x盈盈, 睇下你會有咩x野下場, 你吾x係未見過我點對啲背叛我ge人呀!
佢好大力咁擠左neko一下之後就拉我走, 果陣時我簡直嚇呆左, 從來都無見過人咁暴力, 真係好驚, 所以佢拖住我哥陣我幾乎成身都震曬。
佢拖左我去一條巷仔, 果度咁啱有一個凹位, 佢用兩隻手撐住塊牆, 將我鎖左係原地想走都走吾到。
諒: 你好驚呀?
我: …(我吾知點答佢, 諗左一陣之後就點頭)
諒: 所以我同你講我地無可能系埋一齊, 你跟得我就要預左有第二個好似neko咁ge女走黎同你挑釁, 我之前條女就係頂吾順走左。
我: 係你自己做對吾住佢ge野先。(我指佢同neko上床件事)
諒: 果次係唯一一次, 係neko系杯酒度加料我先會同佢搞!
我: 反正都吾關我事, 放開我啦, 我個頭好痛, 我要返屋企。
諒: 今日點都要講清楚先!
我: 仲有咩好講呀?
諒: 頭先係廁所度未講完ge野!
我: 要講都講曬啦!
諒: 唉…你點解吾可以用個腦諗下, 如果我吾鐘意你就吾會日日搵你啦, 但好似我地呢啲人係配吾上你呀!
我: 吾好再同我講呢啲人果啲人, 鐘意就鐘意, 吾鐘意就吾鐘意, 做咩要咁複雜呀? 我又吾係千金小姐, 講咩竹門對竹門啫, 我淨係知道我鐘意你就係咁簡單, 而且我知道你一定會保護到我呀。
佢無講野, 踎低頭就好用力咁錫我, 果次係我ge初吻, 所以我吾知應該點樣去回應佢, 淨係由得佢用條脷係我個口度撩黎撩去, 我地錫左好耐, 差吾多成十分鐘, 直到差吾多斷氣佢先放開我, 之後大家都好尷尬, 企左系原地。
諒: 你係第一次呀? (以為佢會講咩打破尷尬, 點知係問啲更尷尬ge野)
我: 唔…(我個頭越踎越低, 簡直無臉望佢)
諒: 怕咩啫, 頭先話鐘意我又咁大聲! (佢好溫柔咁攬住我, 突然之間覺得而家ge佢同頭先果個暴力狂完全係兩個人咁)
我: 我幾時話鐘意你呀?
諒: 吾鐘意咩, 咁我自作多情囉, 仲諗住你會做我條女tim! (佢扮曬野咁放開我, 向住大街走出去)
我: 下…做你條女?
諒: 做咩o曬咀呀? 放心, 你講得啱, 我會保護你, 吾會比第二啲人蝦你!
我: 我知你有咁ge能力, 不過我驚係你蝦我咋…
諒: neko ge事吾會再發生第二次, 走啦, 我車你返屋企。
由哥日開始我地就正式拍拖, 係我ge初戀, 我以為我地會好開心, 佢會對我好好, 但係原來一切都係我一廂情願, 好似佢呢種男仔, 我呢啲情場初戈又點會捉得住佢ge心呀!
ken666 2008-3-8 14:01
CH 6 野孩子 (PART I)
我從來無諗過自己ge男朋友會係一個疊碼仔, 更加吾知道跟住佢原來係好痛苦ge一件事, 因為佢無啦啦會消失左幾日, 無啦啦又會受左傷, 無啦啦又會同人曬馬…好多時跟係佢身邊都好驚, 吾知道下一刻會發生咩事, 好無安全感, 但我又吾想同佢講, 因為當初係我執意要同佢系埋一齊, 係我話吾會後悔。
有一次同佢行街, 行到螺絲山附近, 條行人路超窄, 所以我地前後咁行, 我行前面佢行後面, 突然有一部電單車駛到好貼我地度, 坐車尾果個男人除左個頭盔, 用個頭盔打左佢個背脊同個頭幾下, 之後好快咁開車走左, 我好驚咁扶住佢, 見到佢流曬鼻血, 企都企吾隱。
我: 我叫白車呀!
諒: 吾駛啦, 好少事咋, 扶我入去坐坐先啦! (我扶左佢上去螺絲山坐左系張椅度, 見到佢塊面青曬, 我超驚, 吾知點算好)
諒: 打電話比華仔, 同佢講我地系螺絲山, 其他咩都吾駛講, 叫佢即刻過黎。
我: 哦…佢話十分鐘之後到…
諒: 你返去先, 我地有野傾, 遲啲我再搵你啦!
佢錫左我一啖, 我知道我留系度都無用, 所以等到華仔黎到之後我就返左屋企, 雖然好擔心佢, 但我又吾敢打比佢, 因為好驚會阻住佢。
自從果次之後我地就成個幾禮拜無見, 佢完全好似失左蹤咁, 又無打電話比我又無sms比我, 我好驚佢會覺得我煩, 但又好擔心佢, 所以特登用公眾電話打比佢, 諗住聽到佢把聲就收線, 但系佢居然熄左電話。
我好擔心, 於是打電話問yoyo, 諗住打探下華仔ge消息, 點知yoyo話華仔都消失左成個禮拜, 當我知道咩消息都斷曬ge時候, 我簡直癲到日日睇報紙追新聞, 連晚間新聞都吾放過, 就算佢出左事, 起碼我都有個知字呀。
直到又一個禮拜之後, 佢終於都打電話比我。
諒: 傻豬, 瞓左未呀? (果陣已經兩點幾)
我: 你系邊度呀? (聽到佢把聲, 我啲眼淚就吾聽話咁流出黎)
諒: 我系屋企囉, 好掛住你呀, 而家過黎搵你!
我: 下…兩點幾啦, 聽日先啦! (雖然我都好想, 但系始終太夜啦)
諒: 兩點幾又點啫, 你等我一陣, 我而家過黎!
我: 哦。
諒: 乖啦, 一陣再打比你啦!
ken666 2008-3-8 14:02
CH 6 野孩子 (PART II)
十分鐘之後佢就打比我, 果次係佢第一次上我屋企, 所以我企左系門口等佢, 佢一見到我就好用力咁攬住我, 跟住就錫我, 錫左一陣我地聽到隔離屋開門聲就即刻匿返入屋, 果陣覺得我地好似偷情咁, 好搞笑!
返到入屋我就帶左佢入房, 因為我同細佬一間房, 不過暑假佢返左大陸, 所以得返我一個人一間房。
諒: 得你一個係屋企呀?
我: 嗯。(望到佢平安無事, 我啲眼淚又好吾聽話咁流出黎)
諒: 傻瓜, 無端端又喊咩呀?
我: 你知吾知我好擔心你呀?
諒: 我而家咪無事囉!
我: 點解你吾打比我呀? 連訊息都無個!
諒: 同你講過跟得我就要預左會咁, 吾好再講啦, 過黎呀!
佢明顯係有啲嬲, 伸手大力咁拉我坐系佢大腿上面, 又開始錫我, 隻手仲好吾規矩咁不斷摸我, 雖然我地拍左幾個禮拜拖, 但係通常都成班人一齊, 又或者四圍行, 最多都係錫下就算, 從來都未試過做啲咁親熱ge動作, 所以搞到我鬼死咁驚, 又吾知點好, 唯有伸手推開佢, 吾比佢繼續摸我。
諒: 做咩啫? (佢終於忍吾住好大聲咁罵我)
我: 我吾想呀…(我講得好細聲)
諒: 做得我條女就要咁ga啦, 又係你自己話要做我條女ge!(佢推開我, 拎左支煙出黎吸)
我: 我…我吾想咁快呀!(我有啲嬲, 佢講到我好似好姣咁)
諒: 邊x度快呀! 鐘意就搞ga啦, 又話掛x住我。(佢依然好惡, 個樣變得好恐怖)
我: 掛住你同呢樣野係兩件事呀!
諒: 我覺得係一樣wor!
我: 咁我無野好講啦!
佢踢左床邊一下就好嬲咁走左, 我諗左成晚, 到底我有無錯呢?
ken666 2008-3-8 14:02
CH 6 野孩子 (PART III)
第二日我打電話比阿cat, 我同阿諒一齊之後我地都好少見面。
我: cat呀, 我好煩呀! 你系邊呀?
Cat: 我系阿偉度, 煩咩呀?
我: 你同佢一齊? 幾時ge事呀?
Cat: 昨晚囉, 佢一返黎就搵我囉!
我: 下…咁你地一齊左一晚呀?
Cat: 係呀! 仲瞓緊, 比你吵醒咋!
我: 哦…(原來係我單純咋)
Cat: 你煩咩啫?
我: …我煩…我煩…唉, 吾知點講呀!
Cat: 吾方便講呀?
我: 係呀…不如我sms你呀, 不過你吾好比阿偉睇wor!
Cat: 好呀, 咁收線啦!
跟住我就send sms比佢。
我: 我同阿諒昨晚差啲搞左呀! 但我推開佢話吾好, 佢好嬲咁走左, 死啦, 到底我應吾應該同佢搞呀?
Cat: 白痴ga, 想搞咪搞囉!
我: 但我又好驚wor…
Cat: 驚咩啫?
我: 人地第一次呀!
Cat: 哈…以為你驚咩, 超…你吾比佢都會比第二個啦, 驚得咁多, 仲有呀, 好似佢地呢啲男人你吾比佢, 佢地分分鐘去滾呀!
我: 下…但係如果我比左佢, 但佢又去滾呢? 咁我咪蝕囉!
Cat: 哈…小姐, 咁年代呀, 蝕? 吾好笑死我啦! 佢滾你都可以滾呀! 吾講啦, 昨晚搞左成晚好攰呀, 起身再電你!
睇到佢寫啲咁露骨ge野真係心都寒曬, 佢地居然搞左成晚? 佢地不過啱啱先撻著就搞啲咁ge野, 吾怪得之阿諒會話吾快啦!
諗諗下阿cat講得啱, 反正我同阿諒都一齊左, 同佢搞係遲早ge問題, 所以我鼓起左勇氣打電話比阿諒, 我已經預左佢吾會有好聲氣比我聽。
我: 喂, 係我呀…
諒: 做咩呀? 咁早打比我ge? (佢出奇地好聲氣, 好似氹緊細路仔咁)
我: 昨晚…對吾住呀…
諒: 算啦, 吾迫得ge, 就係咁?
我: 嗯, 我吾阻你瞓啦!
諒: 哦, 瞓醒我再搵你呀! (佢對住電話鍚左一下之後就收線)
聽到佢咁講之後, 我突然覺得自己昨晚拒絕佢好似做左好衰ge事咁, 於是我去m記買左兩份早餐套餐, 諗住同佢一齊食早餐。
佢自己一個人住, 我之前試過同華仔佢地成班人一齊上過去一次, 之後就無去過, 不過就知道系邊, 所以無同佢講就去, 諗住比個驚喜佢, 去到佢屋企樓下見到佢架車泊左系度, 應該仲系屋企, 所以我無打比佢就直接上去。
禁左兩下門鈴就聽到屋入面有聲, 以為係佢開門, 點知走左個女仔出黎。
ken666 2008-3-8 14:03
CH 6 野孩子 (PART VI)
X : 搵邊個呀? (佢個身上面著左阿亮件恤衫, 下半身應該無著, 成條美腿露曬出黎)
我: 你係? (雖然好似有啲明知故問, 不過最後都問左出口, 或者佢係阿諒屋企人呢)
X : 我係佢條女呀! (睇清楚啲佢個樣真係好靚, 身材又好, 又夠高, 任何一個男人見到佢都會噴鼻血)
我: 下…我…我…(咁ge情況我真係吾知要講啲咩)
X : 搵阿諒?
我: …吾係…我想問下阿偉系吾系度呀? (我真係無勇氣去面對咁ge局面, 唯有求其作過籍口)
X : 佢無上黎呀, 你係佢條女呀? 不如入黎先啦! (佢打開門叫我入去, 但我就一手閂返度門)
我: 吾駛啦, 我返去先。(啲眼淚已經忍吾住流左出黎, 我即刻擰轉身走)
X : 喂…你做咩咁快走呀…
佢越叫我就行得越快, 最後停左系樓梯底度喊, 個心好痛, 自從同左佢一齊之後我就變得好吾開心, 成日都驚呢樣驚果樣, 而家連我最吾想見到ge事都發生左, 我地一齊左一個月都冇佢就背住我同第二條女一齊, 咁我仲點同佢行呀!
吾通對於佢黎講｢性｣真係咁重要, 只要有｢性｣就可以無愛, 但有愛就一定要有｢性｣?
我吾知匿埋左系樓梯底幾耐, 直到眼淚都喊乾曬先走返出黎, 望住佢露台果條米色牛仔短裙, 個心簡直比刀插左幾百下咁, 點解我會咁傻, 明知愛呢啲男人就要預左比人傷, 但都要中個頭埋去, 唉…好傻呀我!
ken666 2008-3-8 14:03
CH 7 朋友二號 (PART I)
真相終於大白, 自從上次走左之後我就改曬所有電話, 實行要過自己ge新生活, 阿偉同華仔不停咁問阿cat同yoyo攞我個新電話, 但好姊妹梗係會撐我, 完全隻字不漏, 就係吾話比佢地知。
逼於無奈之下, 佢地就扮演左我同阿諒之間ge傳聲筒, 華仔同yoyo講果晚ge女仔係阿諒以前條女, 叫阿欣, 阿諒果晚同我嘈完之後落bar撞返佢, 咁啱佢貓左嘔到阿欣成條裙污糟曬, 所以車左佢返屋企換, 但就咩都無做過。
阿偉同阿cat講, 果日阿諒瞓到下午三點先起身, 阿欣同佢講我上去搵過佢, 佢諗住打比我ge時候我已經cut曬所有電話, 本來想上我屋企搵我, 又驚我比屋企人罵, 佢話阿諒好想見我, 就算分手都想當面講清楚。
聽完佢地講之後, 個心有啲軟, 話曬都係第一次拍拖, 所以吾想咁容易就散, 但又好吾想繼續同一個咁無安全感ge男人系埋一齊, 真系超頭痛! 到左最後我選擇棄權, 由個天去決定我地應吾應該系埋一齊, 如果佢係真心對我, 就一定會諗辦法見我。
過左幾日之後, 佢都無搵過我, 而學校終於開學, 兩個月暑假話咁快就過左, 諗返起呢個暑假發生ge事, 真係百感交集, 吾知點形容好, 但唯一可以懷念ge, 就係我ge初戀咁就玩完左, 雖然吾係好結局, 但過程總算開心過。
同以前返學一樣, 我會約埋住我屋企附近ge阿通一齊返學, 不過今年有啲吾同, 因為佢留左班, 所以我算係佢學姊。
我: 哈…可以同學姊一齊返學, 做咩咁吾開心呀?(我地一向好fd, 但佢暑假比父母帶左去台灣, 所以完全吾知道我發生ge事)
通: 仲講…如果吾係條死八婆miss吾肯比多兩分我, 我就同你一齊讀高二啦, 而家要重讀高一, 真係想死呀! (佢本來已經大我兩年, 而家再留班, 應該算係班入面最老果個)
我: 車, 讀多年咪玩多年lo, 係wor, 我啲手信呢?
通: 係書包呀, 返到去先比你啦! 係wor, 我去左台灣兩個月你搞過啲咩呀?
我: 咪同阿cat做剪線妹lo。
通: 咁簡單?
我: 吾係你話呢?
通: 點知隻衰貓有無教壞你呀, 你知我不嬲都吾鐘意佢ge! (佢同我自細讀同一間幼稚園、小學、中學, 算得上係青梅竹馬, 所以佢成日將我當係妹咁錫)
我: 得啦! 喂, 今日放學一吾一齊走呀? 不過我吾知你地班高一仔要吾要留堂wor! (我乘機又笑佢一餐)
通: 死八婆, 你再講我下個月就吾車你返學, 到時得返你一個行路。
我: 下…咁快出車啦, 仲以為你阿媽吾會買車比你tim!
通: 超, 佢吾買我咪叫老豆買囉, 得我一粒仔吾錫我錫邊個呀! 所以…你而家對我好啲, 我就比你做我第一個乘客。
我: 咁, 通哥哥你想我點對你好呢?
通: wa…好嘔呀!
我: 車…由細到大我阿媽都要我咁叫你啦, 你係哥哥, 我係妹妹嘛!
通: 又吾係親生, 哥咩啫…
同佢傾傾下就返到學校, 每次同佢一齊ge時候都覺得好輕鬆, 無壓力, 之前仲因為同阿諒分開ge事而吾開心, 但而家完全吾覺得係咩一回事, 成個人開心曬, 阿通的確係我ge開心果, 同佢一齊好似做咩都吾駛避忌咁, 因為大家太熟, 太瞭解對方, 好容易就知道對方想點, 果陣我真系覺得好幸福, 雖然無左阿諒, 但我仲有阿通呢個好朋友。
ken666 2008-3-8 14:04
CH 7 朋友二號 (PART II)
之前有好多fd都懷疑過我同阿通ge關係, 覺得我地好曖昧, 好似拍緊拖但事實上又吾係, 雖然我吾知阿通點諗, 但我就從來都無諗過要同佢有更進一步ge發展, 因為如果我地拍過拖, 感情一定吾會好似而家咁好。
入到課室, 有好多人都吾識, 識果啲又吾係好熟, 好彩高中ge座位都係一個人坐, 吾駛煩同邊個坐, 我知道自己矮, 所以好自動咁搵左前面第二行坐, 坐我周圍ge都係一啲我吾識ge人。
悶左一朝, 校長講完野之後主任訓話, 主任訓完話之後到班主任亂吹, 最後無啦啦比人醒左個科代表黎做, 勁無奈, 鬼都知呢啲係最吃力不討好ge岡位。
臨近放學阿通send左條訊息叫我係門口等佢, 行到出去ge時候見到華仔同阿偉企左系度, 吾駛講都知黎接yoyo同阿cat。
我: 佢地未出黎咩?
華: 盈盈, 你知吾知我地搵你搵得好辛苦呀?
我: 下…做咩搵我呀? 我一直都系澳門。
偉: 咪玩啦, 我地夠知你系澳門啦, 但你改x曬啲電話, 想約你出黎都約吾到。
我: 哦…吾同你地講啦, 我約左fd。
偉: 喂, 吾係阿哥都吾講下…
我: …講你知又點啫?
偉: 我一定吾會比阿諒囉。
我: 真係吾會?
偉: 吾會, 果條死仔都吾抵幫。
我: 咁好啦, 6….
我知道我比得個電話阿偉就等於有意要同阿諒系返埋一齊, 不過講真呀, 我真係幾鐘意阿諒囉, 雖然佢有時又惡又吾講道理, 不過佢溫柔起黎真係好鬼死冧人ga, 所以當係比大家一個機會囉, 如果佢吾打比我, 咁就等於我地無緣, 至於會吾會系返埋一齊就睇佢自己ge造化la。
ken666 2008-3-8 14:04
CH 7 朋友二號 (PART III)
之後同佢地吹左一啲無聊野, 見到阿通出黎就同佢地say bye同阿通返屋企。
夜晚, 阿諒真係打比我, 因為佢用左第二個號碼所以我吾知道係佢, 咁就聽左佢電話。
諒: 係我。
我: 嗯...(我吾知點解無即刻收佢線, 仲一直流住眼淚聽佢講野)
諒: 信我一次, 我同阿欣已經無野啦, 佢果晚真係上黎換裙咩簡單, 我貓度系房瞓, 佢就一路係廳度, 我地咩都無搞過。
我: 我點知je, 你都話你貓左啦, 有無搞過你又知。
諒: 你點先肯信我呀?
我: 我都吾知。
諒: 我係你屋企樓下, 你落黎得吾得呀?
我: 唔得wor, 得返我細佬一個係屋企佢會驚ga。(我果陣已經偷偷地系窗口望佢, 見到佢坐左系電單車上面, 真係好掛住佢呀)
諒: 咁我上黎囉!
我: 更加吾得la, 我細佬會同阿媽講ga! 到時實打死我都有份。
諒: 咁又吾得咁又吾得, 咁點呀? (佢把聲超吾耐煩, 又點左一支煙食)
我: 對吾住呀, 一係你黎我屋企門口la, 我出黎等你。(我都吾知點解每次都係我低聲下氣認低威, 明明就係佢錯)
諒: 咁我而家上黎。
過左一陣佢就出現左系我面前, 佢啲頭髮又長左, 大約膊頭落啲, 而且染左一頭金髮, 不良到爆。
我: 做咩吾剪頭髮呀?
諒: 無呀, 覺得咁樣型啲!
我: 嘔...要咁型做咩呀?
諒: 等你有面子啲囉, 老婆!
我: 但我鐘意短頭髮, 清爽一啲wor! (咁就比佢氹返, 真係無骨氣)
諒: 老婆大曬, 你話咩就咩la... (佢伸個頭埋黎想錫我)
我: 吾好啦, 比人見到吾好意思呀!(我推開佢, 但就由佢攬住我)
諒: 咁我聽日去接你放學呀?
我: 哦, 好呀!
諒: 咁我走啦, 仲有, 以後無我同意吾准同第二個男仔一齊放學。
我: 下...
諒: 今日同你一齊果個四眼仔呀!
我: 下...佢係我好朋友嚟ga。
諒: 吾得吾准吾可以。(最後佢就霸道咁錫我, 但錫左一陣就分開左)
諒: 佢有無錫過你?
我: 痴線, 你當我係咩呀? 掂都無掂過呀, 得未呀? 小器鬼!
諒: 我係小器呀, 邊個夠膽搞我老婆我就手都剁左佢, 走啦, 聽日見啦。
ken666 2008-3-8 14:05
CH7 朋友二號 (PART IV)
第二朝我依然同阿通一齊返學, 不過佢臉色就好似吾多好咁。
我: 喂喂, 今日邊個激親你哩?
通: 一個叫安靄盈ge臭八婆。
我: 頂你呀, 響我全朵, 我邊度得罪你呀?
通: 昨晚基仔打比我話見到你同個長頭髮ge男仔係門口度錫錫。(我細佬由細到大都好黏阿通, 當佢係哥哥咁, 但估吾到佢原來係個內奸, 將我ge瘀野周圍唱)
我: ...咁又點得罪到你呀?
通: 又話讀完書先會諗拍拖, 口是心非, 如果比麗姨知道你有男朋友, 佢一定打死你。
我: 通哥哥, 你吾會話比阿媽知ge...(我又開始扮可愛咁捉住佢衣袖)
通: 吾好叫我哥哥, 我吾係你哥哥。
佢講完之後就好快咁行, 完全吾等我, 由得我自己系後面狂追, 到最後我無再追佢, 自己一個人行返學, 根本吾知佢嬲緊咩。
放學ge時候我以為阿通會嬲左我吾等我放學, 所以我無send訊息比佢通知佢吾駛同我一齊走, 點知我一出學校門口就見到佢企系度等我, 後面仲有阿諒企左系度, 好明顯佢地兩個都吾知道對方ge存在。
當見到我踏出門口ge時候佢地兩個幾乎同一時間行埋黎, 而兩個人都感覺到彼此存在ge時候就互相怒睥, 搞到我夾系中間都吾知點好。
諒: 四眼仔, 你睥咩x野呀?
通: 關你x事呀?
諒: xxxx, 我比x機會你講x多次。
通: x你, 駛x你比機會呀, 你邊x個呀?
我: 你地咪嘈先啦, 聽我講好吾好? (為左避免佢地系學校門口發生衝突, 我插入佢地中間將佢地分開)
通: 盈盈, 佢就係你條仔呀?
我: 係呀, 佢叫阿諒, 阿諒, 佢叫阿通, 係我由細到大ge好朋友。(我好強調好朋友三個字, 好驚佢會一時衝動打死阿通)
諒: 咁就無野la, 我地去食下午茶。(佢把聲顫曬, 好明顯係壓住吾發脾氣)
通: 我今日吾得閒去接基仔, 你自己去啦!(講完佢就走左, 以前通常都係佢同我一齊接細佬去補習社, 但佢今日明顯就係為難我)
諒: 我同你一齊去接細佬, 佢可以為你做ge野, 我都一樣做到。
我: 你呷唶呀? (我偷笑, 好開心佢會為我而呷醋)
諒: 走啦!
行左一陣我終於覺得佢今日有啲咩吾同左, 原來佢剪左頭髮, 雖然吾算好短, 不過就無之前咁長, 睇落去順眼好多, 不過最令我開心ge事係佢居然為左我而改變, 個心真係覺得超甜。
ken666 2008-3-8 14:05
CH 7 朋友二號 (PART V)
於是佢車我去接細佬, 然後帶我地去食下午茶, 又買左個細佬好鐘意ge筆盒比佢, 咁就將細佬收買左, 之後佢黎親我屋企我細佬都黏到佢實一實, 鐘意佢仲多過鐘意我。
夜晚, 阿通打電話比我, 佢把聲好沉, 好吾開心。
通: 盈盈, 今日果條仔吾啱你ga, 離開佢啦!
我: 啱吾啱由我自己決定, 如果係fd就吾好講比我阿媽知。
通: 我要點講你先肯聽呀?
我: 我已經十六啦, 有自己ge思想, 吾再係以前果個妹妹仔。
通: 咁我呢? (佢講得好細聲, 不過都係比我聽到)
我: 咩你呀?
通: 你吾好扮吾知啦, 所有fd都知我同你係一pair ga!
我: 但我地係最好ge朋友呀!
通: 係你同我講話讀完中學先拍拖ga!
我: 咁有時候會變ga!
通: 點解吾係我?
我: 傻啦, 你今日已經講左好多笑話la, 吾好再玩啦!
通: 如果我話我認真呢? 系我同佢之中你會揀邊個?
我: 阿通, 真係玩夠啦, 我要瞓覺, 晚安!
我好快咁吸左佢電話, 又熄左手機, 好驚佢會再打黎問我呢啲問題, 我真係吾知點答佢, 我一直當佢係好朋友, 佢突然話鐘意我, 真係吾知點處理。
ken666 2008-3-8 14:06
CH 8 男朋友 (PART I)
第二日返學, 阿通依然好早咁系我屋企樓下等我, 佢一見到我就笑曬咁, 又係書包度攞左啲功課出黎, 好似尋日無發生過任何事咁。
通: 安靄盈學姐, 係時候要幫幫我呢個學弟啦!
我: 咩黎ga?
通: 作文, 你ge強項。
我: 哦, 幾時要呀?
通: 聽日。
我: 咁趕?
通: 快啦, 當係你拒絕我ge賠償。
我: 下…我幾時有呀?
通: 咪扮啦, 尋晚ge事咁快就吾記得la?
我: …sor呀!
通: 如果佢蝦你, 你一定要第一時間同我講, 嘻…係我未有女之前都仲係你ge騎士。
我: 真係好sor呀…
通: 吾好咁啦, 再講就連fd都無得做啦。
我地兩個又好似之前咁邊打邊鬧邊玩住黎返學, 係其他人ge眼中我地依然係最好ge朋友, 不過我地兩個心入面都知道, 我地已經無可能好似返以前咁。
過左一個禮拜, 阿通同左我級ge級花拍拖, 佢之前已經同我講過果條女好鐘意佢, 成日借啲意想約佢出街, 但佢一直都無受, 而家見到連我都有拖拍, 所以就受左佢。
可能係突然之間少左個人陪我返學放學, 又或者係從小到大都習慣左阿通會係我身邊, 所以忽然無左佢ge陪伴好似有啲吾係好慣咁!
自從阿通拍拖之後我就自己一個人返學放學, 自從開學果陣阿諒有黎接過我一兩次之後就無再黎la, 有時真係覺得自己有啲犯賤. 阿通對我咁好我又吾珍惜, 好似阿諒果種忽冷忽熱ge人我就當係寶, 真係好吾明白自己到底想點, 或者呢啲就叫做'男人吾壞, 女人吾愛'la!
好記得果日係2001年9月21日, 果日朝早好好天氣, 但到放學ge時候就落好大雨, 我又無帶遮, 企左系門口度等停雨, 原本諗住搵阿通, 點知去到佢課室門口就見到佢條女企系度等佢, 我好驚比佢見到我個狼狽樣, 所以匿埋左係另一間課室入面, 直到佢地走左我先出返黎, 果陣覺得自己好傻好可憐, 完全吾知點解會搞成咁。
企左系門口好耐, 直到最後離校鐘都響埋, 校工同老師開始趕人走, 但因為出面仲落緊大雨, 所以佢地都由得我地企系門口度等停雨。
再等左一陣, 突然覺得部電話震左一下, 拎出黎睇原來係阿諒send訊息比我, 寫住'我老婆有無比雨淋濕呀?', 我睇到之後啲眼淚即刻流曬出黎, 覺得自己好慘呀, 立刻打左個電話比佢。
ken666 2008-3-8 14:07
CH 8 男朋友 (PART II)
我: 你係邊呀?
諒: 做咩呀? 把聲咁ge?
我: 我...我...我仲系學校呀...
諒: 下...罰留堂呀?
我: ...吾系呀...大雨...我走...吾到...
諒: 下, 咁慘, 吾好喊la, 我而家黎接你la!
我: ...嗯...我...系側門等你...
大約十分鐘之後佢就黎到, 佢將身上面ge雨衣比我著, 自己就淋住雨揸車, 果一刻真係覺得好感動, 攬住佢條腰ge手就更加用力, 好想攬住佢吾放。
佢車左我返佢屋企, 雖然我有著雨衣但條校裙都係濕左一半, 因為果陣好興入面著黑色, 所以我入面差吾多透曬出黎, 我知道佢偷望左我好多次, 但因為上次我拒絕過佢, 所以佢一直都無再對我吾規矩。
諒: 做咩吾一早打比我呀?
我: 我驚你做緊野呀! (佢做野ge時候好少聽電話, 而且佢通常做野ge時候都好惡, 我邊夠膽打比佢wor)
諒: 咁你可以send訊息比我呀!
我: ...哦...
諒: 過黎呀, 你成身都濕曬啦, 我幫你抹乾啲頭髮, 吾系好易病呀!
我行左埋去佢度, 佢攞左條大毛巾幫我抹啲頭髮, 好溫柔咁一下一下咁抹, 搞到我塊面熱到爆。
諒: 傻瓜, 我叫得你做老婆就會錫你, 以後如果再有咁ge事一定要send訊息比我呀! (佢個咀幾乎貼住我個咀講, 搞到我鬼死咁怕醜)
我: 哦...
諒: 你知吾知你咁樣好折磨我呀? (佢隻手開始攬住我條腰)
我: 下?
諒: 若隱若現咁, 聖人都會犯錯la! (佢個咀終於忍吾住錫我, 隻手開始係我身上邊遊走, 最後就停左係我個胸度)
我: 吾好咁la...(我講得好細聲, 隻手捉住佢隻手, 但就吾夠佢大力, 根本阻止吾到佢)
諒: 老婆, 比我好吾好?
我: ...我...驚...
諒: 吾駛驚, 我吾會整痛你ga...
我無再反抗, 由得佢不停錫我, 不停摸我, 佢將我抱左埋梳化度, 佢坐系度我就坐左係佢大腿上面, 因為佢著住條波褲, 所以我可以感覺到佢下面頂住我, 果種感覺好難形容, 有啲驚但又有啲期待, 佢不斷咁同我講吾會好痛, 只要我放鬆啲就得, 我最初都信佢, 但當佢插到入黎ge時候我簡直想一拳打死佢, 果種痛真係吾識去講, 好似比人撕開兩邊咁, 佢見到我咁痛就停左無郁, 系我耳仔邊度講'老婆, 我好愛你, 愛死你啦, 你要記住我係你第一個男人, 亦係你唯一一個男人! 痛就大力抓我。', 我真係好大力咁抓佢, 啲指甲差吾多插曬入佢啲肉度, 我ge第一次就咁比左佢la!
搞完之後佢抱左我入房, 然後去整左條熱毛巾幫我抹走啲血, 果陣我一直用張被遮住塊面, 覺得好羞家, 吾知點去面對佢先好。
諒: 老婆, 頭先係吾係好痛呀? (佢瞓左係我隔離, 攞左支煙出黎食)
我: ...(我點頭, 因為無著衫, 所以將張被卷到好實)
諒: 下一次就吾會痛啦! 你吾好卷實張被啦, 我都要吸呀! (佢伸手去拉張被)
我: 等一陣, 我去著返件衫先啦!
諒: 駛咩著啫, 我地黎多次呀...
我: 吾好啦, 好夜啦, 我要返屋企。(我推開左佢, 卷住張被就著返啲校服)
諒: 不如今晚系度瞓, 我好想攬住你瞓呀!
我: 梗係吾得啦, 得返細佬一個係屋企佢會驚ga!
諒: 咁算啦! 我送你返去。
佢送我返屋企之後並無即刻就走, 因為佢係門口錫我ge時候撞正我細佬補完習返屋企, 細佬雖然得十歲, 但就人細鬼大咩都識啲咁。
弟: 哥哥, 你係我家姐男朋友呀? 我記得你, 上次請我食野同送個筆盒比我果個。
諒: 係呀, 基仔真聰明。
弟: 當然! 家姐, 我好肚餓呀, 你無買飯比我食呀? (佢摸住個大肚腩, 成個可憐樣望住我地, 搞到我好似刻薄佢咁)
我: 我返黎果陣啲飯盒鋪已經關門, 我一陣煮公仔面你食啦!
弟: 媽咪話食得公仔面多會變肥仔ga!
我: 咁你不嬲都肥ga la! (我講完之後佢就喊, 因為佢最憎人話佢肥仔)
諒: 基仔係男仔黎ga, 吾可以成日喊, 如果你吾喊, 哥哥煮野比你食呀! (佢拍拍細佬個頭, 就捲起衫袖行入廚房)
我: 你吾駛理佢wor, 我煮公仔面就得la! (我跟左入去, 佢見到我就即刻閂埋度廚房門錫我, 錫左好耐先放開)
諒: 呵, 又比我偷襲成功!
我: 下…(我臉紅低頭, 佢笑左一笑就開始搜刮食材)
諒: 嘩, 老婆, 你平時食咩ga?
我: 多數都係飯盒, 無得賣先食公仔面囉!
諒: 咁都得? 你入去換件衫我地去超級市場度買啲野返黎煮。
我: 吾駛咁麻煩啦!
諒: 快啲去換衫。(佢成日都係咁, 要佢講第二次ge時候就會大聲罵人)
我好快咁換左套衫就同佢一齊去左來來買野, 以前除左去買零食之外我都好少會去超級市場, 所以根本吾知道原來果度有咁多野買。
諒: 老婆鐘意食啲咩?
我: 無所謂啦, 不過我吾識煮ga!
諒: 唉…我都預左, 而家都無咩邊條女識煮野食。
我: …我會去學ga la。(我細細聲咁講, 嘻…不過我到而家都吾係好識煮野食)
諒: 咁系你未學識之前就等我煮住先la, 事先聲明呀, 吾好要我煮咁耐呀!
我: 知道la! (我好後悔之前無好好咁跟阿媽學煮餸, 搞到而家好瘀皮)
果日真係好開心, 係同阿諒拍拖咁耐以黎最有實在感ge一日, 真真正正feel到自己吾再係一個人, 真係有一個人會好鍚我。
ken666 2008-3-8 14:08
CH 9 她一定很愛你 (PART I)
同阿諒拍拖之後真係覺得自己變左好多, 以前好鐘意同班fd四圍去, 好鐘意識新朋友, 又好鐘意搞唱k燒烤等, 但自從有左佢之後就無再做呢啲野, 因為我放棄左自己ge生活圈子, 走左入左佢個世界度, 雖然我知道咁樣會令到我迷失自我, 但兩個原本生活係吾同世界吾同生活圈子ge人如果真係想幸福咁系埋一齊, 就一定要有一個人作出犧牲, 而我選擇做犧牲者。
並吾係佢吾願意為呢段感情去放棄一啲屬於佢ge生活, 而係因為佢根本融入吾到我ge生活入面, 我知道佢有嘗試過, 好似我同班fd去街ge時候佢會黎搵我, 但佢份人好被動, 又易發脾氣(佢天生如此, 無辦法改ga la!), 你地都知十五六歲ge靚妹靚仔通常思想都仲未健全, 成日都會講同埋做一啲好幼稚ge行為, 睇在佢眼中就會覺得成班白痴仔咁, 所以佢好多時都吾理人, 人地同佢講野就有一句無一句咁, 最後搞到我班fd好無引, 日子耐左我就無再要佢同我地一齊, 通常佢一打比我我就會離隊。
兩個人相處就係咁, 總有一方要做遷就果個, 如果兩邊都撑到行, 就會好容易散。
同佢一齊越耐就越接觸佢班fd多, 除左阿偉同華仔之外, 另外仲有幾個都可以話係佢ge老死, 佢地全部都係幫同一個大老闆做野, 幾乎除左睡覺之外都會系埋一齊, 就係因為咁我同佢其他fd啲女都混得幾熟。
除左yoyo同阿cat之外, 同我最熟ge就係阿mi同啫喱, 啫喱比我地大幾年, 佢已經出左黎做野, 同條仔一齊左兩年幾, 所以最清楚班仔啲野, 通常班仔自己行開玩ge時候我地就會圍埋一齊傾計, 多數都會向佢攞料, 問下自己條仔之前ge野。
Yo: 啫喱, 華仔同我吹話佢之前最高紀錄有七條女wor, 簡直就係韋小華, 係吾係真ga? (yoyo同華仔果陣已經臨近散ge階段, 因為兩個都係貪新鮮ge人, 系埋一齊耐左就自自然然會散)
啫喱: 見係你地先講呀, 佢地個個都好鐘意溝女ga, 除左我條仔同埋阿諒之外, 個個＊不良詞語＊都滾到爛ga! (佢最後仲好曖昧咁望左下面一下)
Cat: 下…吾係卦, 條死仔有幾次搞仲無帶tim!
我: 你地咪咁講la, 佢地都吾係咁ge人!
Yo: 盈盈, 你吾好咁天真la, 佢地呢啲人有邊個會吾滾ga, 就算佢吾想滾, 老闆比埋錢佢地我就吾信真係吾會lo! 我上個禮拜先見到華仔有個中國城ge打火機!
我: 吾會卦…(我好似記得阿諒都有一個)
Cat: 超, 吾會先奇, 阿偉都話佢地之前成日落club, 係呢排乖左之ma!
啫喱: 盈盈, 不過你可以放心, 阿諒從來都係去坐咋, 可能係之前條女睇得佢好緊, 所以佢一向都吾會亂黎ge!
我: 你話阿欣? (我仲記得之前佢係阿諒屋企ge事, 雖然我地都無再提起過佢, 不過我對佢好好奇)
啫喱: 係呀! 佢地拍左年幾, 阿欣一直都好臭串, 成日管住阿諒, 又吾鐘意佢同阿發(啫喱條仔)班人一齊, 有時跟埋阿亮出黎就黑口黑面咁, 我地班人都吾鐘意佢ge, 所以阿諒而家同左你一齊不知幾好呀!
我: 邊度好wor, 我咩都吾識!
Cat: 起碼你乖先la, 你地鬧交果陣阿偉同我講話阿諒話你係好好ge女仔, 又乖又純, 佢覺得吾襯你, 原本佢諗住放你走la, 但佢又吾捨得。
我: 下…我吾知ge?
Yo: 你就係傻人有傻福, 條仔咁錫你。
我: 邊有呀, 佢成日都罵我ga!
啫喱: 你吾好怪佢la, 佢不嬲都吾識表達自己, 郁啲就用罵ge, 佢同阿欣都係咁搞到散之ma, 佢又惡, 阿欣又喪, 兩個就日日又罵又打咁, 你無見到佢屋企無一隻玻璃杯咩? 因為佢地成日用啲杯呀碟呀黎互掟囉!
cat: wa…咁都一齊都年幾呀?
啫喱: 無計la, 你地吾好睇阿諒佢咁cool呀, 其實佢份人都幾重情重義ga, 阿欣有幾次同第二啲仔一齊比佢撞正, 佢都係打條仔發洩, 如果吾係阿欣親口講分手佢真係吾會飛條八婆lo!
Yo: 咩原來係阿諒比人飛ga?
啫喱: 係佢自己傻之ma, 冚世界同佢講果條女吾係好野, 叫佢早飛早著佢吾聽, 又話條女為佢付出好多, 又話條女有時都幾好, 哼, 最後條女咪拖住第二條仔同佢講分手, 不過咁都好, 總算比佢遇到盈盈呢啲又純又聽話ge女仔。
Cat: 超, 佢簡直執到la!
果次聽完啫喱講之後終於知道點解阿諒成日話我聽話, 雖然佢有時真係會好惡咁罵我, 不過我通常都吾會頂返佢, 就由得佢罵, 如果佢真係罵得太過份, 只要我稍為眼紅紅想喊咁, 佢就會收聲, 不過就吾係好會氹返我lo!
ken666 2008-3-8 14:09
CH 9 她一定很愛你 (PART II)
有一次我同同學去唱k, 因為之前阿諒同我講過話有事要上大陸做幾日野, 所以我就無打比佢, 更加無同佢講過我會去唱k。
唱k唱到一半我個fd飲大左, 我扶佢去廁所嘔, 系門口度撞到阿欣, 佢好明顯就吾記得我, 不過我對佢就印象深刻, 雖然係一面之緣, 但就點都記得佢個樣。
佢完全係出黎浦果種女仔, 著低胸短裙, 身材又鬼死咁勁, 相對於我呢啲肥肥地又圓圓地ge女仔黎講, 佢真係超級咁索, 我都吾係好明點解阿諒會同到我系埋一齊。
我望住佢出返去ge方向, 原來就係我地隔離房果度, 記得有人話過’好奇心會殺死人’真係無錯, 我扮搵人偷偷地望入佢間房, 原本想知佢到底會同啲咩人一齊(我都吾知點解果陣會咁八卦), 點知居然比我見到阿諒系入面, 佢坐左係角落頭, 阿欣就坐係佢隔離, 睇個場面好似搞緊生日會咁, 我睇左幾眼就走返自己間房度。
我坐左埋一邊, 好吾開心, 個心一直系度諗到底我算係咩, 如果佢地真係一齊返咪同我講囉, 做咩要瞞住我啫, 咁當我係咩wor? 第三者? 抑或係比人撬牆腳都吾知ge傻瓜呀?
班fd睇住我吾出聲, 問我又話無事, 大家都玩得吾盡興, 最後我覺得吾好意思就同佢地講走先, 果陣已經兩點幾, 所以我企系門口度等的士。
等左成十五分鐘都無的士, 我聽到間k有人行出黎, 好自然咁望返轉頭, 唉…真係撞鬼, 完完全全撞到正, 阿諒扶住半醉ge阿欣由入面行出黎, 佢見到我, 就將阿欣放左係門口邊度坐。
我望住佢, 完全吾知應該比咩反應, 最後唯有對住佢笑。
我: 咦, 你返左黎啦? (我終於知道咩叫淚在心裡流ge感覺)
諒: 係呀, 今晚先返黎! (佢望住我ge眼神好怪, 好似有野想同我講又講吾出口咁)
我: 哦…返黎咪好囉, 我吾阻你地la, 我行果邊, byebye! (我對住佢笑左一笑, 然後向另一個方向行, 而家咁ge環境, 我真係吾知點先可以令到自己無咁難堪)
諒: 你做咩啫? (佢拉住我隻手吾比我走)
我: 返屋企囉! (我扮鎮定咁望住佢, 其實啲眼淚已經流緊出黎)
諒: 我送你返去。
我: 咁佢呢? 你由得佢咁ge樣坐系度咩?
諒: 咁你等我一陣, 我送完佢之後再返黎接你!
我: 哦…(原來佢始終都放吾低阿欣)
諒: 你系度等我, 千其吾好走開, 我好快返。
我: byebye…
望住佢扶阿欣上電單車, 一時又驚佢跌, 一時又驚佢凍親, 鬼死咁溫柔, 試問一架電單車只有兩個位, 點可以同時坐三個人呀!
ken666 2008-3-8 14:10
CH9 她一定很愛你 (PART III)
我無企系原地等佢, 自己一路向屋企ge方向行返去, 由新馬路一直行返黑沙環, 我吾記得行左幾耐, 淨係知道對腳又攰又痛, 就好似我個心咁, 又攰…又痛…
行到消防局附近, 有一架車用好光ge車頭燈照住我, 搞到我睇吾清楚前面ge野, 之後就比人好大力咁攬住, 最初我以為有色狼, 但當我聞到果個人身上面ge氣味, 我就知道佢係阿諒。
諒: 做咩吾等我呀? (又係好惡ge語氣, 不過就聽得出佢好緊張)
我: 我眼瞓咪返黎先囉!
諒: 吾好同我講大話! 係吾係又諗住好似上次咁粒聲吾出玩失蹤? 跟住換曬啲電話號碼等我搵吾到你, 咁就當同我無曬關係?
我: …(我無講野, 因為佢已經講曬我要做ge野)
諒: 點解你成日都收收埋? 你吾開心咪講出黎囉, 你吾鐘意我同佢有關連咪出聲囉, 你見到我同佢一齊你可以發癲打我罵我ga, 點解你咩都吾做呀? 點解要自己一個人食曬呀?
我: 你鐘意人打你罵你ge話你可以去搵阿欣呀, 我吾會做呢啲野你係知ga, 我根本吾係你鐘意果類型ge女仔, 點解要揀我啫? (果次係我第一次向佢發咁大脾氣)
諒: 你知吾知自己講緊咩呀? 你將自己條仔推比第二條女呀! (佢好大力咁踢左垃圾桶一腳)
我: 你本來就吾屬於我, 我從來都無得到過你。
諒: 你講咩x野呀? 你無得到過我? 咁我地呢三個月算咩呀?
我: 你根本當我係阿欣ge替代品。
諒: 你痴x線ga, 我而家就證明比你睇!
佢好霸道咁壓住我個頭, 好用力咁錫我, 逼我埋牆度要我無地方走, 佢果陣已經進入瘋狂狀態, 完全無諗過果度係街黎。
X: 喂, 你地係度做咩? (有一個巡更ge警察行左埋黎)
諒: 同條女煙韌囉, 阿sir! (佢將我收埋系身後面, 吾比個警察見到我喊緊個樣)
X: 但條女好似吾願意wor, 靚仔, 你行開, 我要問佢! (阿諒逼不得己讓開, 由我同個警察講)
我: 對吾住呀, 佢係我男朋友! (我拖起佢隻比警察睇)
X: 妹妹, 下次呢啲野返屋企先做la! 仲有呀, 你地好快啲開走架車。(佢例行查我地身份證之後就走左)
見到個警察走左之後我即刻縮返隻手, 但佢就捉得好實, 死都吾肯放手。
諒: 係你自己認係我條女, 我無逼你ga!
我: 頭先我吾咁講你實比佢拉走!
諒: 老婆, 我同佢真係無野ga, 吾好嬲la!
我: 我吾係你老婆la!
諒: 咁如果我將呢樣野帶系你隻手度呢? (佢系個袋度攞左隻介指出黎, 係一隻鑽石介指, 雖然吾算大粒, 不過就好閃)
我: 下…(我望住隻介指呆左)
諒: 吾好咁la, 雖然係細粒左啲, 不過係我今次上大陸做野ge全部人工黎ga, 原本諗住一落黎就搵你, 點知八婆欣話佢比人啲左去間k度圍, 我諗住一場朋友無理由吾幫佢, 先會去間k度, 點知佢原來昆我啫! (佢見到我個樣有啲心軟就借啲意錫埋黎)
我: 我…
我本來想講話我吾要, 但最後已經比佢錫住左個嘴, 想講都講吾到。
果晚, 我無返到屋企, 破天荒第一次上左去佢屋企過夜。
